Bygger bru mellom generasjonar 

Fjellsportfestivalen vert arrangert kvart år i fjellsporthovudstaden Sogndal, midt i hjartet av fjell- og fjordnoreg. Med høge toppar, djupe dalar og snørike vintrar er Sogndal den ultimate plassen å drive fjellsport – året rundt!

Festivalen treffer på tvers av generasjonar og har masse å by på, både for lillesøster og bestefar.

– Vi er med og støttar Fjellsportfestivalen fordi den bidrar til å få folk i alle aldrar ut i naturen, seier banksjef Jørgen Follevåg Mjelleli. 

– I tillegg koplar festivalen på store delar av næringslivet i Sogndal. Rundt 50 samarbeidspartnarar er med og gjer dette til ein unik festival, som lokkar til seg både tilreisande, studentar og lokalbefolkninga. Festivalen byr på alt frå foredrag og fagleg innhald til fest og moro. Eg trur ein skal leite lenge etter eit arrangement som famnar like breitt som Fjellsportfestivalen, og det er ei stor glede for oss i Sparebanken Vest å vere med og bidra til folkefesten, held han fram. 

Gratis for dei yngste  

Årets festival gjekk av stabelen 21.–25. februar, og under opningsseremonien på kaia i Sogndal sentrum dødsa folk frå 8- og 10-meteren rett ned i den iskalde vinterfjorden. 

– Unge og eldre stod skulder ved skulder og kosa seg, det var utruleg kjekt å sjå, seier banksjef Mjelleli. 

Sparebanken Vest er ein av hovudsponsorane, og støtta frå banken er kjærkommen. 

–Det er vanskeleg å setje ord på kva støtta frå Sparebanken Vest og dei andre samarbeidspartnarane betyr, i tillegg til dei frivillige som legg ned enormt masse jobb. Eg har gråte mang ei tåre med tanke på all støtta vi får. Det betyr så enormt mykje. Eg er den einaste tilsette og kan sitje og planlegge festival så mykje eg berre vil, men utan samarbeidspartnarane og dei frivillige hadde det ikkje blitt nokon festival, seier dagleg leiar Kamilla Marifjæren og held fram: 

— Fjellsportfestivalen blir arrangert i vinterferieveka, og vi ønsker å skape kjekke aktivitetar, ikkje minst for barna. Det er gratis for dei yngste å vere med.

Barna får dobbelt opp med sin eigen festival. Det er eit lågterskeltilbod med alt frå skikurs til snøballkasting på blink. Og diplom sjølvsagt. På Barnas Fjellsportfestival er alle vinnarar. 

Sparebanken Vest delte ut tatoveringar og rundt 70 premiar til barna som deltok mellom anna på parallellslalom i strålande vêr. Banken var til stades med aktivitetar gjennom heile veka, diverse foredrag, næringsfrukost i Hodlekve og stand. 

Utandørs på dagtid 

Fjellsportfestivalen er ein todelt festival. På dagtid er det fullt trøkk i skibakken på Sogndal skisenter Hodlekve. Skileverandørane har skidemo, og sponsorane er med og lagar aktivitetar. Det er kajakkutfor, frikøyringskurs, yoga zen og god mat og musikk. 

Ein eigen gledespatrulje har som einaste oppgåve å gå rundt og lage god stemning. 

— Dei lagar moro med forskjellige leikar: Hoppe tau og trikse med ball – med ski på beina sjølvsagt! Og så bakar dei bollar og deler ut. Dei er ei stor glede i seg sjølv, seier Marifjøren. 

Eit av dei største høgdepunkta er Monster Pond Skim, som i korte trekk går ut på å køyre ski over ei 10-15 meter lang hole med vatn, gravd ut midt i bakken, med eit lite hopp på slutten, der ein kan flippe nokre triks. Kjem ein ikkje over – og det skjer frå tid til anna – blir det kaldt. Veldig kaldt. 

— Den yngste var 5 år og den eldste 74 år. Det er gøy, seier Marifjæren som synest det er minst like underhaldande å sjå på som å delta med ski på beina. 

— Det er skikkeleg kult å sjå på dei som torer. Og skulle ein trenge ein pause frå all ståheien, kan ein spenne på seg langrennskia og gå i trakka løype til Britabu, der frivillige ventar med vaflar og kaffi. 

Innandørs på kveldstid 

På kveldstid flyttar festivalen innomhus på Quality Hotel Sogndal. Programmet er rikhaldig: føredrag, stand-up, DJ-ar, konsertar med både lokale og nasjonale artistar, quiz og basar med gode, gamle årer. 

I fjellsportlobbyen foregår diverse aktivitetar, for eksempel stiller bedrifta Me Syr med sysaker og impregnering for å hjelpe folk å fikse utstyret. Kvar kveld er det premieutdeling og vising av dagens video, og så klart afterski – eller «klakk hotellet itteski» som det heiter på den lokale dialekta.

Fjellsportfestivalen heidrar heimstaden og fargar programmet med lokal koloritt, og kan slik sett ikkje ha ein betre støttespelar enn Sparebanken Vest. I 200 år har banken stått saman med lokalsamfunna for å gjere livet i Vest endå litt betre. 

Foto: Kevin Breuer