
Langeland skisenter
Skiskyting - no også i Sunnfjord
Det heldt på å bli ein smule bakglatt i drifta av skisenteret på Langeland – ei støtte frå Sparebanken Vest blei smurningen som skulle til.
Noko av det første Cathia Lone Caviezel Baarøy gjorde som banksjef var å stå framfor fleire hundre menneske på Sunnfjordgalla og dele ut støtte til gode formål.
— Det får ein kalle ein fin og meiningsfull start på jobben, seier Baarøy som nyleg vart konstituert som banksjef for Førde-filialen.
— Å få bidra til fellesskapen og å støtte eldsjelene som sikrar levande lokalsamfunn, er noko av det kjekkaste ein gjer i min jobb.
Sunnfjordgalla vart arrangert for første gong i historia 20. januar 2024. «Legg att janteloven og den trauste sunnfjordingen heime», var oppfordringa frå arrangementet som fann stad i Sunnfjordsalen på Scandic Sunnfjord i Førde. Rundt 300 personar hadde møtt opp i finstasen for å heidre dei som på ymse vis gjer Sunnfjord til ein god kommune å vekse opp, bu og leve i. Sparebanken Vest bidrog til den gode stemninga med å dele ut støtte til fire ulike formål.
— Eg skal innrømme at eg kjende det i kroppen, då eg stod der på scena framfor så mykje folk. Det er viktige formål vi støttar, og i det ligg det eit alvor. Men først og fremst var det ei hyggjeleg stund og god stemning, seier banksjefen.
I stortrøye frå Jølster
Blant fleire flotte folk som Sparebanken Vest gjorde stas på var Kjetil Bjørset og Thomas Haugsbø, styreleiar og nestleiar i Langeland Ski- og Fritidssenter, og Torbjørn Os frå Førde IL Skiskyting.
Skisenteret fekk kveldens største gåve på 500.000 kroner.
Kva kler ein eigentleg på seg når ein skal ta imot ein halv million kroner under ein galla? Skidress?
— Haha! Nei, eg stilte i stortrøye. Eit gammalt Jølster-ord for blazer. Utan slips, vel å merke, seier Kjetil Bjørset.
— Det er vanskeleg å setje ord på kor kjærkomen denne gåva er, held styreleiaren fram.
— Den gjer oss i stand til å ferdigstille skiskyttarstadion.
To tredelar av jobben er gjort. Grunnarbeidet er ferdig. Det gjenstår ein del betongarbeid, det må kjøpast inn skyteskiver, og så snart snøen fer, startar arbeidet med å bygge standplassen.
— Det har tatt fleire år å komme hit. Med støtte frå Sparebanken Vest kan vi endeleg få realisert det siste, store steget i utviklingsplanen for anleggget, eit prosjekt som viste seg å bli mykje meir omfattande og betydeleg meir kostnadskrevjande enn vi hadde trudd, seier styreleiaren og held fram:
— Det var ikkje fritt for at eg løyste sveitten då det vart klart kor stort sprengingsarbeidet vart, og kor mykje massar som måtte flyttast. Det drog på seg med kostnader. No kan vi ferdigstille skiskyttarstadion utan å tappe skisenteret for eigenkapital eller prioritere vekk andre naudsynte tiltak. Det er bra, både for breidda og dei som vil satse på toppnivå. Med eit slikt anlegg kan det komme flere som tek etter Karoline Erdal, som for tida går i verdscupen, seier han.
Når asfalten er på plass, vil skiskyttarstadion dessutan vere i drift også på sommaren, i rulleski-sesongen.
— Ein kan trygt seie at vi er glade på Langeland i dag, seier han.

Frå venstre: Torbjørn Os frå Førde IL, styreleiar i Langeland ski- og fritidssenter Kjetil Bjørset og Konstituert banksjef ved Sparebanken Vest i Førde Cathia Baarøy. Foto: Jostein Vedvik
Friske fråspark
Langeland er Førdes svar på Nordmarka. Skisenteret er ei lita perle for folk som bur i og rundt Førde. Det er nært, og dersom ein har ein fleksibel jobb eller opne helger, kan ein nytte dei solrike vinterdagane. Det er ikkje kvar dag sola klarer å trenge gjennom skylaget her på Vestlandet, for ikkje å snakke om ned mellom fjella. Då er det godt å kunne køyre ti minutt opp i høgda for ein dose D-vitamin.
— Det er noko vi veit å verdsetje her på våre kantar, seier banksjef Baarøy.
Ho gjekk til innkjøp av nye felleski for eit par år sidan. Dei bøter på dårlege barndomsminner på altfor bakglatte ski. «Sytalaust», synest ho, og tar seg gjerne ei runde rundt Bjørnaholtløypa. Ho har allereie vore der eit par gonger i år.
— Å bidra til levande lokalsamfunn er eit av satsingsområda våre og Langeland er med på å gjere Sunnfjord til ein attraktiv plass å bu. Skisenteret er kjempepopulært og kjem mange til nytte. Folk kjem seg ut, noko som har veldokumenterte fordelar for helsa. Det blir lagt ned uendeleg mange dugnadstimar der oppe, og det er ei stor glede for oss i banken å få vere med og bidra, seier Baarøy.