Mekkar tilhøyrsle og gode relasjonar

Stryn Gatebilklubb er meir enn ein bilklubb. Det er ein ungdomsklubb som er open for alle, ikkje berre for dei som likar å mekke og rulle.  

Berebjelken er å ta vare på kvarandre og jobbe mot utanforskap, fint formulert i denne «formålsparagrafen»:  

«Målet er å skape ein open og inkluderande møteplass, der vi jobbar aktivt for at ungdommane i bygda vår skal ha det bra, både på klubben og med seg sjølve. Klubben skal vere open ettermiddag og kveld, og i helgene. Her skal ungdommane oppleve å bli sett og møtt på interessene sine, få lære og utvikle seg, og kjenne at dei høyrer til.» 

Snakk om utveksling!

— Solskinshistoria om Stryn Gatebilklubb gjekk rett i hjartet på oss i Sparebanken Vest, seier Lisbeth Mikkelsen, seniorrådgjevar i Sparebanken Vest, avdeling Stryn. 

For Stryn Gatebilklubb er ei historie om å få ting til å skje. Det starta med eit radarpar: Monica Beate Hesjedal, ungdomskoordinator i Stryn kommune, og Paul Øyvind Glosvik, eldsjel i gatebilmiljøet. 

Enkelt sagt går jobben til Hesjedal ut på å kartlegge behova til ungdommane i Stryn, og ho hadde ikkje vore lenge i jobben før ho fekk høyre om mekkegarasjen som gatebilmiljøet har ønskt seg i årevis. 

«Vi skal ikkje berre gire opp eit par hakk?» spurde ho Paul Øyvind. Og snart såg ein berre fartsstipene etter dei. 

— Vi snakka med forskjellige folk, både i lokalpolitikken og næringslivet. Ganske raskt fekk vi legge fram saka for kommunestyret; eg som representant for ungdommane, og han som representant for gatebilmiljøet. Bodskapen vår var at «vi treng ein plass å høyre til», noko som gjekk rett heim hos politikarane. Vi fekk kjemperespons, og opplevde at vi vart lytta til og tatt på alvor, seier Hesjedal. 

Kommunestyret omsette tanke til handling på rekordtid og kom opp med ei løysing: Petterneset, eller gamle E-verksbygget, som ligg på ei av dei finaste tomtene langs elva i Stryn sentrum. 

Tre månader seinare, i juni 2023, vart vedtaket klubba gjennom: Stryn Gatebilklubb får leige bygningen av kommunen. 

Frå ruin til møteplass

Det siste halve året har det blitt lagt ned ein enorm innsats. Bygget har gått frå praktisk talt å vere ein ruin som etter planen skulle rivast, fråkopla vatn, straum og avløp, til å bli ein attraktiv møteplass. 

Folk har stått i kø for å hjelpe til med både pengar og dugnadstimar. Næringslivet, privatpersonar, banken og heile bygda. 

— Då vi høyrde at klubben hadde klart å skaffe lokale tidlegare i år, skjønte vi at no kan vi bidra. For det trengst pengar også, i tillegg til engasjement og dugnad, seier Lisbeth Mikkelsen i Sparebanken Vest.  

Ungdommar blir ofte gløymde i samfunnet, særleg etter skuletid og ikkje minst i pandemigenerasjonen. Vi høyrer om ungdommar som føler seg utanfor, som ikkje har nokon å vende seg til. 

— Det handlar om å skape møteplassar. Stryn Gatebilklubb treffer breitt. Det er ein klubb som engasjerer fleire enn dei som likar å skru bil, både ungdommar og vaksne. Klubben står for veldig viktige verdiar: openheit, inkludering, ta vare på kvarandre og snakke saman, seier Mikkelsen og held fram: 

— Vi i Sparebanken Vest er heldige som får vere med og gjere ein forskjell i lokalsamfunnet.

Ein plass å høyre til 

Klubben disponerer halve underetasjen og heile overetasjen. På første plan er det ein verkstad for mekking, og opp trappa er det fritidsklubb med fleire rom, kjøkken og langbord. Her kan ungdommane ete mat og gjere lekser i lag. Det er alltid vaksne frivillige til stades. 

Stryn Gatebilklubb er resultat av laginnsats og har heile bygda i ryggen. 

— Ingen kunne fått til dette åleine. Ikkje gatebilmiljøet, ikkje næringslivet og ikkje kommunen. Men vi mobiliserte i lag, og vi spelte kvarandre gode, seier Monica Beate Hesjedal.